Hitsch Brosi in den Regierungsrat Graubünden

Nus na duessan betg prender il museum Beyeler ni il Kunsthaus a Turitg sco punct da referenza, mabain noss agens museums che reflecteschan nossa ierta e nossa identitad a moda professiunala. Museums sco il Museum regiunal Surselva (Glion), la Ciäsa Granda (Stampa), la Casa Tomé (Poschiavo) èn puncts da referenza per s’orientar.

Il “siemi dalla notg sogn Gion” inscenà questa stad a Laax è vairamain stà in siemi, era sche las notgs n’èn betg stadas tuttas uschè da stad. Tgi che pretenda meds finanzials da promoziun, na dastga betg mo far pretensiuns, mabain sto era ademplir pretaisas. La promoziun da la cultura duai definir sias pretaisas.

Da la represchentaziun da la 9avla sinfonia da Beethoven als concerts dal Chor da giuvenils grischun – las producziuns musicalas en il Grischun èn vairamain excepziunalas. Forsa, perquai che la musica n’enconuscha betg cunfins politics e linguistics.

Tgi che vul chapir las particularitads dal Grischun sto studegiar sia istorgia. I vala dilucidar la istorgia culturala da noss chantun ch’è nunditg ritga e multifara. L’Uniun per la perscrutaziun da la cultura grischuna ha prendì a mauns quella lavur realisond projects gronds sco il Manual per la istorgia grischuna ni il studi Il funcziunament da la trilinguitad en il Grischun.

La trilinguitad cun sia varietad d’idioms e dialects è atgnamain noss segn da marca cultural. Quel è tuttavia suttapost a midadas socialas. Igl è absolutamain necessari da sustegnair tuttas mesiras per franar l’erosiun da las linguas minoritaras e da las varietads dialectalas e da promover talas era ordaifer lur territori tradiziunal. La lescha da linguas è in prim pass en la dretga direcziun. Ma era ina lescha na fraina betg il process d’erosiun!